موسوعة الشعر الشعبي ابوذيات ودراميات عراقيية

موسوعة الشعر الشعبي ابوذيات ودراميات
عراقية

تكلي بعد ما اريدك ولا ابيك
هاي اطباع مو منك ولا بيك
ابد ما الوم والدتك ولا ابيك
الوم الوكت الرهاك عليه


اريد الزم خديدك واشتمنه
واريد انعل ابيك واشتمنه
تدري شراد كلبي وشتمنه
على صدرك انام الليل وهاي هيه


حلو وياك كلبي صفه نيته
يريد يكون يمك صفه نيته
شارعنه بجمالك صفينيته
وطاح من الركن للركن بيه



معاد الناس كلهة وانتة أصلي
مثل غصن بفروعك وانتة أصلي
راح اوكف ابابك وانتة اصلي
وكل طلقة التجيني ضماد الية



قدر مكتوب حبك وانتة قسمة
الواحد مالة ناتج من تقسمة
لون بسيوف كلبي من تقسمة
دشوف معزتك شنو امسوية بية



وگع گلبي بغرامك ماتشيله
وجرح شوگ البيه ماتشيله
اخابر وأنته تسمع ماتشيله
ولك هالروح ماتحمل أذيه



حبيتك واصبحت ابغير .. عالم
ورب العرش يشـهدلـي .. وعالم
طالب اني عندك وانت .. عالم
تشرحلي وترد تمتحن بيـه




حبيبي جروح الك بل روح حالن..
وأمس چنت احسن من اليوم حالا..
أريدك تنتخيلي وتمر حالا..
باچر وين ماتلحگ علية



يشطك جاري مايه من يعبره
خذت دوم الاوادم مني عبرة
تكول عليه جاهل من يعبره !
وانه اسوه العلمك واسوه أبيه(ابوه)



هام العگل من شوگگ وجن بيك
وشبيه الگمر من يضون وجن بيك
ابوسك لو يحبسوني وجن بيك
أوامر من وزير الداخليه



غرف رمان بخـــــدوده غرف تين
ويريت اغرفلي من حسنا غرفتين
داجر مشتمل كلبي غرفتيـــــن
والايجار بوسه بكل مسيــــــــه




ردت طيفك يلوح بيوم مالاح
وطعم فركاك صار هواي مالح
بعد مادز رساله وابد مالح
لان كلما ادز مترد عليه



روحي من الهجر ملت وسالت
عليه احباب لانشدت وسالت
الف دمعه الجرت مني وسالت
ولادمعه الجرت منهم عليه




حياتي عكب شخصك شلي بية
وجميع اعضاي صارت شلل بية
توديلي رسايل شلي بية
اريدن شوفتك والكعدة سويه





انه بحبك ابد مايوم غشيت
وعن كل البنات النظر غشيت
گعدت يمه وعليه بسكوت غشيت
وگف صاح المدرس غش عليه




اف من زماني اه منه
على اللي عشرتي وياه منه
اكله الدرب هذا يكول منه
اكله فوت بيه يرد عليه




نصحته اولا نفع وياه نصحاي
سكاره احنه بهواه مابعد نصحاي
جفاني وصرت نصي ميت نصحاي
نحيل ولا اثر نكاد بيه




صرت كهوه لحبيبي بوسط فنجان
فن انس الي يوصله فن جان
اذا العاقل نضرلك نضره فنجن
وانه المجنون وتكلي انظر اليه




جنت انت المرض وانت دوالي
وصارت بالجدم منك دوالي
اهديتك گلبي وتگلي دولي
وصرت دم ودمع تذرف عليه



بنات الوكت يا ناس مرضني
يرضي بيهن الكلب مايرضيني
مره يقيني يصيب وياهن مرضني
ضني بكيدهن ميه بالميه



انتخيل نحل جسمك ونتصوره
انته اشرحلي حالك وانته صوره
ابوسنك واحضنك وانته صوره
وانه وصورتك نغفه سويه




بعدك انه احسن بيه بعدين
عصافير بحجر والقصد بعدين
اكلك يمته اشوفك كلت بعدين
ياهلبعدين يمته تصير جيه




ابوذيات من تأليفي
علي تاهت سفنهم من سفانه
ويهل شكلج شكل نبته سفانه
يسألوني واكول اسمج سفانه
واذوبن لو يمر طيفج عليه



زماني بس حزن ماشفت منه فرح
الشامت من شافني طش واهليه وفرح
كلت لونا اصارح لو اصارح فرح
بس اخاف مكبله وشلون بيه


ابوذيات يوميه ارددهن لا ن كلش حلوات

مامحدود حبنه وماله جانب
والشافك تسودن ومال جانب
جمالك موطبيعي مال اجانب
احسك من ذهب مخلوق اليه


اليحبك من صدك ياترف حبله
وصلي وياك ماينقطع حبله
احبك وانت امك بيك حبله
وحجزتك كبل ماتنخطب هيه


وحق سوره الم نشرح والف لام
بعد ماتنفع اعذارك ولافلام
الف لاموني عن حبك والف لام
وعشر تالاف بس تحجي عليه


حرت مابين اتاني ومااتاني
مو ميه الشماته مائتاني
اتاني والاريده مااتاني
اجه المااريده ووغف عليه


لاجريدي بقه ببيتي ولافار
يجدري الماحمه ميه ولافار
لااني مكمل الخدمه ولافار
اركض والعريف ايسوك بيه



اريد الدنيه تصفــه وياي بس يوم
وشوفك يا كحيل العين بس يوم
تنوح امي عليه وصحت بس يوم
الذنب ذنب الدهر قاسي عليه


ترص ايدك واعاني من رص يدك
وانا الصياد واحلم مرة اصيدك
اذا سنتات ظلن من رصيدك
دخيلك بالجذب رمش علية


احس حلوات خزرني وفاتن
وحسنهن يجذب الناظر وفاتن
حظي الماحوه مروه وفاتن
اخذني يكود بيه لجاسميه


يامن بالكلب والروح حليت
اجرعت مر الصبر وهواي حليت
الك جم مشكله ياحلو حليت
وهواك المشكله الصعبت عليه



ابوذيات عله اسماء بنات


صعدت جبل حبج مهاوي
وانه كلبي لغيرج مهاوي
احبج مااحب غيرج مهاوي
لان انتي العقل والروح اليه



مسجون وعلي كومه دعاوي
حته بمصر كالوا ده عاوي
انحمت اعدام من زعلت دعاوي
وصدرلي افراج من حنت عليه



وحق الي خلق بالكونين الاء
مثل عيون الغزاله عيون الاء
امد ايدي عليها اتكول اوه لاء
تأدب لاتمد ايدك عليه



ناتي الان للاوف لاينات


اشوفج مو مثل ماشوف كل الناس
لان دقة جمالج عالارض تحفة
احذرج وحدج بالغرفة لتكعدين
بس تصفن الحسنج توكع الغرفة


وهذا شعر خرافي لاي بنيه حلوه بالجامعه


انت الجامعه وكل احنه الج طلاب
ويضل بيج العميد الدلع والخفه
تعليمج العالي اقسم عليج ايلوك
بس حسنج بجفه وعلمج ابجفه
سكنتي المكتبه هاكد شريتي اقلام
ودخلتي الامتحان اشحالتج كلفه
اخذتي انت صفر مو لان ماتقرين
لان ذاب القلم بجفوفج الترفه
بالسنتر دخيلج فدوه لتمرين
لان كل مره منج تنكلب زفه
جم طالب تسودن من دلع ممشاج
ومن كد الثكل جم طالب اتوفه
حددتي البشر بالحمره والتحديد
عزه بعينج ولج مارايده الشفه
امس لفه اشتريتي ومن حلات اشفاج
كامت بالشفايف تاكل اللفه





طبع ذيب وغزاله تجمعن بيك
وسبحانه الجمع رقه بشراسه
الناس تكوم تحرس من يجي الليل
وانته الليل لازملك حراسه
لغز ماحله كلمن حاول وياه
بشرجسمه الكمر والشمس راسه
ياواحه عسل والعمر خلص جوع
على كيفك بس دبج ماردنه طاسه




جان الكلب خالي واني جنت وحيد
عليج شجابني ويمج شوداني
صفه ليلي صبح والصبح مثل الليل
وغارك بالعشك من دون صحباني
وجوة الناس تضحك والافراح تزيد
واني بكل وقت تضاعف احزاني
وقوي جان الكلب وعيوني خوش عيون
مابجاهن احد مهما اذاني
بس انتِ غرامج كدر يلوي الايد
وضعفني وكبال الناس بجاني




دنياتك صبح مابيهه لون الليل-
عايش بالنهاروليك عيونك-
ماعندك حلك عندك ورد ينباس-
ليلوامسطرات اتسطرسنونك-
تفوز انته الملك من تدخل استفتاء-
واحله اهل الارض لازم يخلونك-
وماصدك هلك ينطوك لانسان-
وبس ليوسف المفروض ينطونك




حقج ما دريتي بحالتي شصار
من عني ابتعدتي وكَلتي زعلانه
ما أكَدر بدونج هذا واقع حال
الكَلب ينبض شلون وماكو شريانه



يبو طول الحلو لا تبعد أترجاك
لأن بعدك أحس ايزيدلي اجنوني,,,,
و لأن مره غبت ما شافتك هالعين
حظر نظرات سوت لجلك عيوني




يالكلج إنوثه من الجدم للراس
وأحس كلبي بضحكتج ياكل بروحه
جمالج موطبيعي يدوخ الصوبين
ومامعصومه روحي ودوم مفضوحه
الدرس علم الطبيعه والجمال يفوز
إذا بدقة جمالج قدم طروحه





مثل ظلك جنت بالخطوة نمشي ثنين
مشيت انت بظلام وتيهت ظلك
دليني عليك سنين تايه بيك
امشي وياي ادورك خاطر اندلك
عرفني عله شخصك رايد احجي وياك
بس كلمة وبعد ما غيرها انكلك
وحدة من الثنين ووحدة راح اختار
لو كلك احبك لو احب كلك




سبحان الخلق هاي الترافة-
وحط كل الجمال بعينك الحلوه-
وسبحان الصنع هذا الشعروالطول-
وانطاك المحنه وشال كل قسوة-
ياريحة مسك ياعنبر المشخاب-
ياهيبه الدله وريحة الكهوة-
-----------------------------
يوسف من طلع يتمشه عانسوان-
صح جرحن اديهن لكن باشوه-
بس انته بطلعتك مالكينه اجفوف-
كمنه انكص ادينه بكل اثر خطوة



وهذا شعر اذا واحد زعلان من الاخر شعر خرافي

اذا زعلان كَلّي حتى اراضيك
بس صعبه اليحب يزعل على روحه

واذا قصدك عتب وتكَول ناسيك
هم شايف بشر يتبره من روحه

انتَ تعيش بيه شلون امر بيك
لا تسأل بعد عالجيه والروحه

وعلى باب العشگ تذكر واتانيك
وتتأخر علي دمعاتي مفضوحه

ومثل حال الطفل حالى من الاكَيك
اشوف الدنيا عيد وانتَ مرجوحه

هسه تريد تزعل يعني اخليك
لو مو بس عذر لو جايب اطروحه


نأتي الان للدارميات

شماتي مو شمات ... شماتي اخوتي


حتى أمي يأهل الناس تتمنه موتي


===============================


شماتي مو شمات شماتي أشرار


بالقبر ويكَولون ياربي بالنـــــــار


===============================


شماتي مو شمات شماتي سبعــــــه


والثامن صغيرون يأشر بصبعــــــــه


===============================


شماتي مو شمات شماتي شرطـــــه


فوق القبر ويصيحون بايكَله جنطـــه


===============================


شماتي مو شمات شماتي شمات


فوق القبر ويصيح حي بعدة لو مات


===============================


شماتي مو شمات شماتي ورطـــه


نصهم أمن وإجرام والباقي شرطه


===============================


شماتي مو شمات شماتي فطـــــــر


بالقبر دكَو شيش خافو ليتفطـــــــــر


===============================


==============================

صب دمعي على الكَاع واحركَ دغلهه


والبصره والعشار هيه ونخلهـــــــــا


==============================


أرد اسأل العشاق من مثلي مشتاق


بحضني غافي اهواي وابجي من الفراق


==============================


بطل وربع جريت كل قصدي أنساك


وتاليهه بآخر بيك بالمزة الكـــــاك


==============================


من فوك سبع جبال دمعي أريد أَهديه


دورَنهْ يا لحلوات تلكن سمج بيــــــــــه


==============================


متعجب بدنياك دمعك سمج بيـــــــــه


دمعي يفيض إِشطوط حوت الغرك بيه


==============================


حط باللبن تيزاب ممنون اشربـــــــــــــه


بس لا أشوفك يوم تمشي ويه غربة


==============================


عمد أرد أمر عالدار وشبع مَغَمة


وبجي بجي المفطوم من يذكر أمه


==============================


شماتي ألفين ومضاعف إعداي

أبقَ أبعزم دوم بس كونك أوياي




اتمنى ان تنال رضاكم

يسلمووووووووو غاليتي بنت العراق موسوعة رائعة

تعجبني اللهجة العراقية هي قريبة للخليجية

يعطيكِ العافية غاليتي ما ننحرم من جديدك الرائع والشيق

ودي وتقديري

كلامك تمام ملكه اللهجه العراقيه قريبه من لهجة الخليج
شكراحبيبتي

شكراياعمري على مرورك العطر

موسوعة رائعة عزيزتي بنت العراق

لا حرمنا الله من جديدك المميز دائما

نورتوا موضوعي شكرالمروركم